Fotografia blir oppbevarte saman med papirdokumenta dei har tilknytning til, eller dei er lagra for seg i spesialmagasin. Det gjeld både negativ, papirkopiar og lysbilete. Dei eldste fotografia er frå ca. 1860, men dei fleste er frå 1900-talet. Svart/kvitt-teknikkar dominerer, og fargebilete er med få unnatak frå andre halvdel av 1900-talet. Postkort med fotografi som utgangspunkt blir arkiverte som fotografi.

Papirpositiv/kopiar vart laga frå negativ i vekslande tal og format etter behov. Derfor kan same fotografi finnast i fleire eksemplar og i fleire arkiv.

Sjukehusporselen frå Porsgrund Porselensfabrik A/S, 1950-åra. Foto: Teigen. RA PA-0895 Foreningen Brukskunst U48_75_012.

Fotografia er som regel ikkje detaljregistrerte og heller ikkje ordna etter topografi eller emne fordi dei som oftast er del av eit arkiv. Leitinga må derfor starte i arkivkatalogane. Du må fyrst finne fram til kva for ei myndigheit, verksemd, lag eller person som har arbeidd med emnet du søkjer.