Sjølvberging og erstatningsvarer
Når det var dårleg med mat å få kjøpt i butikkane, måtte ein tenkje nytt og utnytte dei høva som baud seg fortil å skaffe nok mat og det som trongst av utstyr.
Verst i byane
![Bil-med-generator](/utforsk-arkivene/andre-verdenskrig/hverdagslivet/sjolvberging-og-erstatningsvarer/_/image/df7a3822-0c46-4a34-b410-0ed9c6cd1219:2c3dc6ae07e2a153fcfb162d2022e7db717827bd/width-768/Bil-med-generator.jpg)
I byane var det spesielt kritisk når det ikkje var varer å få kjøpt i butikken. Dyrking av poteter, kålrot og gulrøter blei vanleg aktivitet for einkvar som hadde ein hageflekk til rådvelde. Kommunane fordelte parsellar i park- og utmarksområde og prydelege rosebed blei erstatta av nyttige potetfelt. I NTB sitt krigsarkiv kan du sjå ei rekkje fotografi med fyldige bilettekstar som viser korleis folk brukte fantasien og korleis mangelen sette sitt preg på korleis ein innretta seg.
Ugras-mat og papirklede
![Selvberging-2](/utforsk-arkivene/andre-verdenskrig/hverdagslivet/sjolvberging-og-erstatningsvarer/_/attachment/inline/947b844b-1388-4b9d-9a7d-8087e06ffabe:3f0a3e5ecbb08233ced4ba4d3cb9556b4af5aadc/Selvberging-2.jpg)
Naturressursane blei utnytta til fulle. Bærplukking skaffa kjærkome vitamintilskot utover vinteren, sjølv om syltetøyet blei skrekkeleg surt på grunn av mangelen på sukker. I arkivet etter NS sin kvinneorganisasjon finst ein heil del oppskrifter, råd og tips til husmødre om matlaging, sying og utnytting av dei ressursane ein hadde. Dette gjeld særleg i arkivserien ”Heim og ætt”. Dette var kvinneorganisasjonen sitt blad. Til redaksjonen kom det eksempelvis inn tips om bruk av ville vokstrar som skvallerkål, nesle og villkarve i matrettar og hestekastanje som såpe. Bruk av avispapir til saumarbeid er eit anna eksempel.
Villagrisar
Kaninhald, høner og gris blei vanleg i byane sjølv om arealet var knapt og tilgangen på fòr var dårleg. I arkivet etter Reichskommissariat finst reglement om såkalla villagrisar. I dette arkivet kan ein også finne oppskrifter på krisemat og utgreiingar om alternative produksjonsmetodar for auka ressursutnytting.